കേരളത്തിലെ യാക്കോബായ സാന്നിദ്ധ്യം
( തുടർച്ച …3 )
ഫാ. മാത്യു കൊച്ചാദം പള്ളിൽ
അടുത്ത കാലത്തായി കേരളത്തിലെ ചിലരുടെ വാദഗതികളായി ഉയര്ന്നുവന്ന ചിന്തയാണ് നൂറ്റാണ്ടുകള്ക്കു മുമ്പ് പേര്ഷ്യന് സഭയും ഇന്ത്യന് സഭയുമെല്ലാം അന്ത്യോഖ്യന് അധികാരത്തിന് കീഴിലായിരുന്നുവെന്നത്. സമീപകാലം വരെയും ഇപ്രകാരമൊരു വാദഗതി എങ്ങും കാണാനില്ലായിരുന്നുവെന്ന് മാത്രമല്ല, കേരളത്തിലെ സീറോ മലബാര്, സീറോ മലങ്കര, ഓര്ത്തഡോക്സ്, മര്ത്തോമ്മ തുടങ്ങിയ പരമ്പരാഗത സഭകളൊന്നും ഈ വാദത്തെ അംഗീകരിക്കുന്നുമില്ല. 1666 ലെ മാര് ഗ്രിഗോറിയോസിന്റെ വരവിന് മുമ്പൊരിക്കലും കേരള ചരിത്രത്തില് യാക്കോബായ സാന്നിധ്യം കാണാനുമാവില്ല.
ചരിത്രത്തിലെ രണ്ട് അന്ത്യോഖ്യന് പരാമർശ വാദങ്ങള്
ഇന്ത്യയില് അന്ത്യോഖ്യന് പാത്രിയര്ക്കീസിന്റെ അധികാരം ദ്യോതിപ്പിക്കുന്ന ചരിത്രത്തിലെ രണ്ട് പരാമര്ശങ്ങള് താഴെക്കൊടുക്കുന്നവയാണ്. വെനീസിലെ ലത്തീന് പാത്രീയര്ക്കീസിന് അന്ത്യോഖ്യയിലെ മെല്ക്കൈറ്റ് പാത്രീയര്ക്കീസ് പത്രോസ് മൂന്നാമന് 1054 ല് എഴുതിയ എഴുത്താണ് ഒന്ന്. അത് ഇപ്രകാരമാണ്: ”അങ്ങയുടെ പ്രദേശത്തേക്കാളും എത്രവലുതാണ്, ബുള്ഗേരിയ, മഹാബാബിലോണ്, റോമാഗീരിസ് അഥവാ കൊറോസാന്, കിഴക്കിന്റെ മറ്റു പ്രവിശ്യകള് എന്നിവ ഉള്ക്കൊള്ളുന്ന ദേശം. അവിടേയ്ക്ക് ഞങ്ങള് മെത്രാപ്പോലീത്തമാരെയും (ആര്ച്ച് ബിഷപ്പ്സ്) കാതോലിക്കാമാരെയും അയയ്ക്കുന്നു; അവര് തങ്ങള്ക്ക് കീഴുള്ള സ്ഥലത്ത് മെത്രാപ്പോലീത്താമാരെയും മെത്രാന്മാരെയും അഭിഷേചിക്കുന്നു. എന്നാല് ആരും സ്വയം പാത്രിയാര്ക്കീസ് എന്ന് വിളിക്കുന്നില്ല” (“Reputa quanto regione tua major sit Bulgaria; erum hac amplior Babylon magna, et Romagyris sive Chorosan …”. Patrologia Graeca 120, cols 759-762).
രണ്ടാമത്തെ പരാമര്ശം കാണുന്നത് 12 ആം നൂറ്റാണ്ടിലെ രേഖയിലാണ്. അന്ത്യോഖ്യയിലെ ഗ്രീക്ക് (മെല്ക്കൈറ്റ്) പാത്രിയാര്ക്കീസ് ബാഗ്ദാദിലും റോമാഗീരിസിലുമായി രണ്ട് കാതോലിക്കാസുമാരെ നിയമിച്ചതായി കാണുന്നുണ്ട്. നീലൂസ് ദെക്സാപാത്രിയൂസിന്റേതായി (1143) കണക്കാക്കപ്പെടുന്ന ആ കുറിപ്പില് റൊമാഗീരിസിന്റെ കാതോലിക്കോസിന്റെ അധികാരം ഇന്ത്യവരെയും ഉണ്ടായിരുന്നതായി പറയുന്നു. ”അന്ത്യോഖ്യായിലെ പാത്രിയര്ക്കീസ് ഏഷ്യമുഴുവനും, പൗരസ്ത്യദേശത്തും ഇന്ത്യയിലും അധികാരമുള്ളയാളായിരുന്നുവെന്നും അവിടേയ്ക്ക് റോമഗീരിസിന്റെ (എന്ന് വിളിക്കപ്പെടുന്ന ദേശത്തിന്റെ) കാതോലിക്കോസിനെ വാഴിച്ച് അയയ്ക്കുകയും ചെയ്തിരുന്നു” (“Antiochenus possidebat universam Asiam et Orientem, Indiamque ipsam, in quam ad haec usque tempora catholicum ordinans mittit Romogyreos vocatum, …” P. G. 132, cols 1087-1088).
ഇവിടെ സൂചിപ്പിക്കപ്പെടുന്ന റോമാഗീരിസ് അഥവാ കോറോസാന് എന്നത് ഇന്ത്യയ്ക്ക് വടക്കുള്ളതും മധ്യ ഏഷ്യയുടെ ഭാഗമായ പ്രദേശമാണ്. അതുകൊണ്ട് തന്നെ മര്തോമ്മ ക്രിസ്ത്യാനികളുടെ മേല് പ്രസ്തുത അന്ത്യോഖ്യന് (മല്ക്കൈറ്റ്) സഭ അധികാരം പ്രയോഗിച്ചിട്ടില്ല. തന്നെയുമല്ല, ഈ പരാമര്ശങ്ങളൊക്കെയും അന്ത്യോഖ്യയിലെ മല്ക്കൈറ്റ് – ഗ്രീക്ക് സഭയുമായി ബന്ധപ്പെട്ടാണ്. അവര്ക്ക് ഒരിക്കലും കേരളത്തിലെ സഭയുമായി ബന്ധമില്ലതാനും. 1666 ല് കേരളത്തിലെത്തിയ മാര് ഗ്രിഗോറിയൂസാകട്ടെ, സിറിയന് മോണോഫിസൈറ്റ് അന്ത്യോഖ്യന് സഭയിലെ ആളായിരുന്നു. അതുകൊണ്ട് തന്നെ കേരളത്തിലെ സഭയ്ക്ക് 17 ആം നൂറ്റാണ്ടിനു മുമ്പ് അന്ത്യോഖ്യന് യാക്കോബായ സഭയുമായി ഹയരാര്ക്കിക്കല് ബന്ധമുണ്ടായരുന്നുവെന്ന് പറയാനാവില്ല. (Dr. J. Kollaparambil, “Sources on the Hierarchical Structure of the St. Thomas Christian Church in the Pre-Diamper Period” in Marganitha Kynanaitha, 277.)
നിഖ്യാ സൂനഹോദോസിന്റെ നാലൂം ആറും കാനോനകള് പേര്ഷ്യന് സഭയെ അന്ത്യോഖ്യന് സിംഹാസനത്തിന്റെ കീഴിലാക്കിയെന്നും അതുകൊണ്ട് തന്നെ പേര്ഷ്യന് സഭയില്നിന്ന് ഇന്ത്യയിലേക്ക് വന്ന ഉറഹാ മാര് യൗസേപ്പും ക്നായിതൊമ്മനും അന്ത്യോഖ്യന് സഭയുടെ അധികാരത്തിന് കീഴാണെന്നും ചില വാദങ്ങള് ഈ അടുത്ത കാലത്തു കാണുന്നുണ്ട്. നിഖ്യാ സൂനഹദോസിന്റെ നാലും ആറും കാനോനകള് എന്ത്, അവ പേര്ഷ്യയില് നടപ്പിലായിരുന്നുവോ, അക്കാലത്തെ രാഷ്ട്രീയ സാഹചര്യമെന്ത്, പൗരസ്ത്യ സുറിയാനി സഭയുടെ ഹയരാര്ക്കിക്കല് വികാസമെന്ത്, കുടിയേറ്റ കാലത്തെ ചരിത്ര പശ്ചാത്തലമെന്ത് എന്നിവ മനസിലാക്കുമ്പോഴാണ് പ്രസ്തുത ചോദ്യത്തിനുള്ള ഉത്തരം കിട്ടുന്നത്. ഇനി അതേക്കുറിച്ച് ചിന്തിക്കാം.